'Memórias de um Negro de Campo' trátase do segundo adianto do novo disco da banda compostelá, acompañado dun videoclip gravado ao vivo.
'Memórias de um negro de campo' está inspirada nunha conferencia impartida por Malcom X en novembro de 1963. Nela, o líder antirracista norteamericano explicaba que unha parte dos escravos estadounidenses (“os negros da casa”) apostaban por colaborar cos escravistas para obter melloras individuais a custa dos dereitos dos seus iguais.
Fronte a eles estaba a maioría dos “negros de campo”, os que non renunciaban a súa liberdade, malia quedaren sen as migallas do amo. Esta é unha dicotomía que foi tamén descrita para os campos de exterminio nazis, mais que non é exclusiva de contextos de violencia extrema. Ao contrario: é unha realidade que pode observarse en todos os conflitos sociais. É por isto que Memórias de um negro de campo pretende ser unha homenaxe para todas aquelas persoas que poñen os intereses colectivos por diante dos seus desexos individuais.
O video foi gravado ao vivo na Sala Capitol, de Santiago de Compostela, o pasado 4 de Febreiro. As imaxes e produción do mesmo, correron a cargo de Tingalaranga Audiovisual.
